Guðmundur Ingi Guðbrandsson, félags- og vinnumarkaðsráðherra, og Willum Þór Þórsson, heilbrigðisráðherra, boða til opins kynningarfundar mánudaginn 5. desember nk. kl. 11:00-13:00 á Hilton Reykjavik Nordica vegna heildarendurskoðunar á framtíð þjónustu við eldra fólk á Íslandi.

Efni fundarins er kynning á drögum að aðgerðaáætlun til fjögurra ára sem lögð verður fram á Alþingi vorið 2023. Áætlunin er unnin af verkefnastjórn um heildarendurskoðun á þjónustu við eldra fólk.

Félags- og vinnumarkaðsráðherra og heilbrigðisráðherra skipuðu verkefnastjórnina í sumar á grundvelli áherslna í stjórnarsáttmála og í framhaldinu var undirrituð viljayfirlýsing á Kjarvalsstöðum. Um er að ræða eitt af stærri verkefnum ríkisstjórnarinnar sem hverfist um að tryggja skuli eldra fólki þjónustu við hæfi, hvort sem um er að ræða heimaþjónustu á vegum sveitarfélaga eða heilbrigðisþjónustu, á forsendum fólksins sjálfs, á réttu þjónustustigi og á viðunandi tíma.

Fyrr í haust stóð verkefnastjórnin fyrir vinnustofu með hagaðilum til að undirbúa gerð aðgerðaáætlunarinnar og hafa niðurstöður hennar verið nýttar við gerð þeirra afurðar sem kynnt verður á fundinum 5. desember.

Auk kynningar á drögum að aðgerðaáætluninni verða flutt stutt erindi um samþætta félags- og heilbrigðisþjónustu og tími gefinn fyrir spurningar og umræður. Fundinum verður streymt.

Boðið verður upp á léttar veitingar og því er óskað eftir að þau sem hyggjast mæta á staðinn  skrái sig fyrir fram: Smelltu hér til að skrá þig.

Frekari dagskrá verður send þegar nær dregur.

Bestu kveðjur,

Ráðherrar