Siðareglur LEB – Landssambands eldri borgara gilda fyrir starfsemi LEB en eru einnig hugsaðar sem fyrirmynd fyrir starfsemi aðildarfélaga þess.
TILGANGUR SIÐAREGLNA ER AÐ
- veita LEB stuðning í veigamiklu hlutverki þess við að stuðla að almannaheill í samfélaginu.
- upplýsa almenning um þau gildi sem móta starf LEB og aðildarfélaga og auka traust á starfi þeirra.
- hvetja til gagnrýnnar og uppbyggjandi umræðu um starfsemina.
- auka gagnsæi, efla góða stjórnarhætti og faglegt starf í þágu eldra fólks og alls almennings.
- setja viðmið um breytni, fagmennsku og ábyrgð sem hvílir á starfsfólki, stjórnum og sjálfboðaliðum umfram lagalegar skyldur.
ÁBYRGÐ GAGNVART ALMENNINGI, FJÖLMIÐLUM OG SAMFÉLAGI
- LEB veitir áreiðanlegar og réttar upplýsingar sem skýra samhengi þess sem kynnt er hverju sinni. Þess skal gætt að notkun fræðilegra hugtaka og tölfræði séu aldrei villandi eða óaðgengileg almenningi.
- LEB starfar sjálfstætt að markmiðum sínum. Það hefur hagsmuni almennings og umbjóðenda sinna að leiðarljósi.
- LEB gætir þess að starf þess í þágu almennings takmarkist ekki af skuldbindingum eða þrýstingi stjórnvalda eða annarra hagsmunaaðila.
- LEB hefur umhverfissjónarmið ávallt að leiðarljósi í rekstri sínum og sýnir með því gott fordæmi í umgengni við náttúru og samfélag.
ÁBYRGÐ GAGNVART SKJÓLSTÆÐINGUM, FÉLAGSMÖNNUM, NOTENDUM, UMBJÓÐENDUM OG STYRKTARAÐILUM
- LEB ber ábyrgð á starfi sínu og sýnir öllum virðingu og trúnað.
- Gagnsæi um starfsemi LEB skal tryggt og veittar skulu áreiðanlegar og skýrar upplýsingar um starfsemina.
- LEB mismunar ekki þeim sem þeir eiga í samskiptum við, hvorki á grunni þjóðernis, kyns, kynhneigðar, fötlunar, trúar, skoðana eða annars fjölbreytileika.
- LEB leitast við að styrkja mannlega reisn með því að beita sér gegn misvirðingu gagnvart manneskjum, þar á meðal einelti, kynbundinni- og kynferðislegri áreitni og ofbeldi.
- LEB og aðilarfélög misnota hvorki stöðu sína né bregðast trausti þeirra sem þau eiga í samskiptum við.
ÁBYRGÐ STJÓRNA, STARFSFÓLKS OG SJÁLFBOÐALIÐA
- Stjórnir, starfsfólk og sjálfboðaliðar vinni af heilindum að markmiðum og tilgangi LEB og aðildarfélaga.
- Stjórnir, starfsfólk og sjálfboðaliðar nýta ekki trúnaðarupplýsingar í eiginhagsmunaskyni eða í þágu vina eða skyldmenna.
- Stjórnir, starfsfólk og sjálfboðaliðar virða störf annarra félaga og samtaka, sýna hver öðrum virðingu, samstarfsvilja og stuðning og stuðla að framgangi verkefna.
ÁBYRG FJÁRMÁL ALMANNAHEILLASAMTAKA
- Meðferð fjármuna skal vera samkvæmt viðurkenndum bókhalds- og reikningsskilavenjum og skoðun reikninga í höndum kjörinna skoðunarmanna eða endurskoðenda.
- Upplýsingar um fjárhag og rekstur skulu vera gagnsæjar og settar fram á einfaldan og skýran máta.
- Öll fjáröflun skal hafa skýr markmið og fara fram í samræmi við tilskilin leyfi. Áætlað kostnaðarhlutfall liggi fyrir áður en safnanir hefjast og er gert upp að söfnun lokinni.
- Upplýsingar um ágóðahlut af hvers kyns sölu eru birtar strax og þær liggja fyrir.
- LEB og aðildarfélög gæta þess að tengjast ekki aðilum sem starfa í ósamræmi við tilgang og markmið þeirra.
- LEB og aðildarfélög afla ekki fjár með nokkrum þeim hætti sem telja mætti siðferðilega vafasaman.
- Starfsfólk gætir ráðdeildar í daglegum rekstri og við meðferð fjármuna félagsins.
GILDISSVIÐ OG VIÐBRÖGÐ VIÐ BROTUM
- Siðareglur þessar eru birtar á heimasíðu LEB og aðildarfélög skulu fylgja þeim. Þær eiga við um alla sem taka að sér störf fyrir LEB.
- Stjórn LEB tekur við ábendingum um brot á þessum siðareglum og bregst við þeim. Stjórnin úrskurðar í hverju tilfelli hvort um brot sé að ræða, telji hún tilefni til að fjalla um ábendingu um slíkt. Við meðferð mála skal gæta trúnaðar, meðalhófs og andmælaréttar.
- Brjóti aðili tengdum LEB gegn siðareglum þessum skal hann í samráði við stjórn LEB bæta fyrir brotið eins og hægt er, leita sátta og birta eða leiðrétta viðeigandi upplýsingar eða gera aðra þá bragarbót sem þurfa þykir.
- Þess skal gætt að sá sem leggur fram upplýsingar um ætlað brot á siðareglunum, beri ekki skaða af.
- Aðildarfélög LEB geta eftir atvikum sett sér sértækar siðareglur í samræmi við þessar reglur og eftir þörfum starfsvettvangs síns.
Samþykkt á landsfundi LEB í Borgarnesi 9. maí 2023
Þessar siðareglur eru samkvæmt siðareglum Almannaheilla, samtök þriðja geirans, sem LEB er aðili að. Sjá nánar: https://almannaheill.is/almannaheill/sidareglur/