Ályktun landsfundar vegna Öldungaráðs Reykjavíkurborgar

Ályktun vegna Öldungaráðs Reykjavíkur, samþykkt á landsfundi 29. apríl 2025

Aðalfundur Landsambands eldri borgara (LEB) haldinn 29. apríl 2025 mótmælir harðlega þeirri ákvörðun borgarráðs Reykjavíkur frá því í ágúst sl. að fækka fulltrúum Félags eldri borgara í Reykjavík og nágrenni (FEB) í Öldungaráði, úr þremur  í einn.

Landsamband eldri borgara eru heildarsamtök. Tilgangur þeirra er að tryggja samstillta hagsmunabaráttu félaga eldri borgara. Skv. 7 gr. laga um málefni aldraðra eiga félög eldri borgara að tilnefna þrjá fulltrúa í öldungaráð í öllum sveitarfélögum landsins.

Borgarráð (í umboði Borgarstjórnar) ákvað einhliða á fundi sínum 15. ágúst sl. að fækka fulltrúum Félags eldri borgara í Reykjavík og nágrenni í Öldungaráði Reykjavíkur úr þremur í einn.                                                           

Breytingin felur í sér að brjóta á bak áratugalanga baráttu Landsambands eldri borgara um lýðræðislega og samstillta  hagsmunabaráttu eldri borgara svo fulltrúar meirihlutans í Reykjavík geti handvalið ákveðin félagasamtök án gagnlegs rökstuðnings.

Félag eldri borgara í Reykjavík (FEB) er eina félag eldri borgara í Reykjavík sem berst fyrir réttindum eldri borgara og er með um 16 þúsund félagsmenn.

Aðalfundur LEB haldinn 29. apríl 2025  skorar á Borgarstjórn Reykjavíkur að endurskoða ákvörðun sína og fjölga fulltrúum FEB í þrjá eins og öldungaráð var skipað í mörg ár.