Ályktanir samþykktar á Landsfundi LEB 2026

Ályktun um húsnæðismál á landsfundi LEB 2026

 Fundurinn lýsir yfir áhyggjum af stöðu margra eldri borgara á húsnæðismarkaði. Fjöldi þeirra hefur svo lágar tekjur að leiguhúsnæði er eini kosturinn. Mikilvægt er að tryggt sé að húsaleiga fari ekki yfir 25% af ráðstöfunartekjum, í samræmi við lög nr. 52/2016 um almennar íbúðir.

 Fundurinn bendir á að skortur á lóðum hefur hamlað uppbyggingu hagkvæmra leiguíbúða á vegum óhagnaðardrifinna leigufélaga.  Lögum samkvæmt skulu sveitarfélög tryggja lóðir og styðja við uppbyggingu slíkra íbúða til að mæta brýnni þörf eldri borgara fyrir öruggt og viðráðanlegt húsnæði.

 Fundurinn leggur jafnframt áherslu á mikilvægi þess að sveitarfélög tryggi eldri borgurum raunhæfan afslátt af fasteignagjöldum í samræmi við greiðslugetu þeirra. Slíkar aðgerðir geta skipt sköpum fyrir marga sem búa í eigin húsnæði en glíma við lágar tekjur og hækkandi framfærslukostnað.

 Fundurinn fagnar boðaðri fjölgun hjúkrunarrýma og þeirri auknu tryggingu sem það veitir fólki sem þarfnast slíkrar þjónustu. Mikilvægt er að áfram verði unnið að uppbyggingu og aðgengi að slíkum úrræðum til að mæta þörfum aldraðra í samfélaginu og að rekstur hjúkrunarrýma verði tryggður með fagfólki. Skorað er á lífeyrissjóðina að þeir komi að þessari uppbyggingu.

 Fundurinn skorar á stjórnvöld og sveitarfélög að vinna markvisst að lausnum sem bæta húsnæðisöryggi eldri borgara og tryggja þeim mannsæmandi búsetuskilyrði.

Samþykkt á landsfundi LEB 29. apríl 2026.

Ályktun um kjaramál á landsfundi LEB 2026

Fulltrúar aðildarfélaga á landsfundi Landsambands eldri borgara í Reykjavík 29. apríl 2026 fagna þeim auknu áherslum sem Landsamband eldri borgara hefur lagt á kjara- og húsnæðismál félaga sinna.

Sambandið hefur talað mjög skýrt í viðræðum við pólítíska flokka að ekki verði endalaust beðið eftir réttlæti okkur til handa.

Sambærilegir hópar hafa farið langt fram úr okkur er varðar hækkun á grunnlífeyri og almennu frítekjumarki og þeir eldri borgarar sem hafa lægstu tekjurnar eru skildir eftir.

Það er óviðunandi að það séu um 1200 manns sem eru með heildartekjur undir 399.000 krónum á mánuði. Það er öllum ljóst að þetta er hópur sem lifir í fátækt og því ber stjórnvöldum að rétta hlut þeirra.

Engum dylst sú ósanngirni sem felst í þeirri kjaragliðnun sem átt hefur sér stað frá gildistöku núverandi laga um almannatryggingar með þeim breytingum sem tóku gildi 1.janúar 2017. Um hver áramót hefur bilið breikkað á milli lágmarkstaxta launafólks og grunnlífeyris TR, og er staðan í dag sú að munurinn er orðinn 110.501 kr.

Það er ekki sanngjarnt að nú sé almenna frítekjumarkið aðeins 43.658 kr. á mánuði og á að fara í 60.000 þann 1. Janúar 2028 skv. stjórnarsáttmála. Það hefur ekki fylgt verðlagi og þýðir aukna tekjuskerðingu hjá eldri borgurum.

Landsfundurinn skorar á ríkistjórnina að efna loforðin sem eru í stjórnarsáttmálanum sem allra fyrst en ekki geyma það til loka kjörtímabilsins. Því ber þó að fagna að breytingin á lögunum varðandi tenginu við launavísitölu var samþykkt á þingi núna í vor.

Landsfundurinn krefst þess að:

•                    Að greidd verði sérstök uppbót mánaðarlega til þeirra sem eru með lægstu tekjurnar.

•                    Almenna frítekjumarkið verði að lágmarki kr. 100.000.

•                    Kjaragliðnunin verði bætt ekki bara stoppuð.

•                    Að sett verði sérstakt frítekjumark vegna fjármagnstekna.

•                    Að ráðið verði í embætti umboðsmanns eldri borgara.

•                    Að 70 ára og eldri fái að greiða áfram í lífeyrissjóð.

Fundurinn skorar á stjórn og kjaranefnd sambandsins að fylgja kjaramálum félagsmanna sinna eftir af festu og einurð.

Samþykkt á landsfundi LEB 29. apríl 2026