Ályktun landsfundar í húsnæðismálum

LEB vill stórfellt átak í húsnæðismálum eldra fólks

Húsnæðisnefnd Landssambands eldri borgara gerir þá kröfu til stjórnvalda að gert verði  stórfellt átak í að byggja ódýrar og hagkvæmar íbúðir, þar með taldar þjónustuíbúðir, fyrir eldra fólk. Margir eldri borgarar hafa lágar tekjur og og eiga ekki annan kost en að vera á leigumarkaði. Leiga á almennum markaði er svo há að lífeyririnn dugar varla  fyrir húsaleigu.   

Mikilvægt er að húsnæðiskostnaður verði aldrei hærri en 25% af ráðstöfunarfé fólks sbr.lög nr.52/2016 um almennar íbúðir, en ljóst er að þessi kostnaður er oftar nær 50% og í mörgum tilfellum hærri.  Leggja  ber því áherslu á óhagnaðardrifin félög við  uppbyggingu leiguíbúða. 

Lífsgæði fólks eru misjöfn en eitt er víst að grunndvallar atriði er að allir hafi þak yfir höfuðið. Því er það okkar krafa í LEB að komið verði til móts við þann stóra hóp fólks sem á í erfiðleikum með að ná endum saman  vegna mikils kostnaðar við húsnæði. 

Lífsgæði eldra fólks eiga ekki að vera bundin við það hvort þau hafi efni á húsnæði heldur er það skylda okkar, að allir hafi þak yfir höfuðið og geti þannig átt ánægjuríkt ævikvöld.