Heilbrigðisráðherra hefur ákveðið að ráðast í heildarúttekt á þjónustuferlum, hugmyndafræði, innihaldi og gæðum heilbrigðisþjónustu fyrir einstaklinga með áfengis- og vímuefnasjúkdóma. Slík úttekt er nauðsynleg til að undirbyggja vinnu við mótun stefnu til framtíðar í þessum málaflokki þar sem settar verða fram heildstæðar tillögur um samþættingu og samvinnu fyrsta-, annars- og þriðja stigs heilbrigðisþjónustu. Samhliða úttektinni verður skoðaður fýsileiki þess að samþætta heilbrigðis- og félagslega þjónustu gagnvart notendum og aðstandendum.

Dr. Helga Sif Friðjónsdóttir mun annast úttektina í samvinnu við Erlu Rut Árnadóttur starfsnema og aðra starfsmenn heilbrigðisráðuneytisins og markmiðið er að rýna: árangur þjónustuveitenda, þjónustuferli innan stofnana og milli stofnana, hugmyndafræði að baki þjónustu viðkomandi stofnunar og innihald veittrar þjónustu. Að auki verður skoðað hvaða sértæku þarfir tilteknir hópar gætu haft m.t.t. heilbrigðisþjónustu vegna áfengis- og vímuefnavanda.  
Fulltrúi LEB, Ragnar Jónasson formaður FEBK, hefur verið boðið á Team fjarfund vegna þessa. Á fundinum verður rætt m.a.:
 
1.        Hvað í núverandi kerfi virkar og hvað ekki fyrir þann hóp sem samtökin sinna málsvarastarfi fyrir?  
2.        Hvernig væri æskilegt að breyta núverandi heilbrigðiskerfi til að koma betur til móts við þarfir hópsins?
3.        Hvaða aðrar upplýsingar telja samtökin að varpi frekara ljósi á málefnið?